БАРОИ НАМОЯНДАГОНИ ВАСОИТИ АХБОРИ ОММА ОИД БА ИНЪИКОСИ ИММУНИЗАТСИЯ БАР ЗИДДИ ВИРУСИ ПАПИЛОМАИ ОДАМ
Санаи 27-уми августи соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон машғулияти омӯзишӣ барои намояндагони воситаҳои ахбори омма (ВАО) дар мавзӯи «Инъикоси дурусти иммунизатсия бар зидди вируси папилломаи одам» оғоз гардид.
Дар чорабинӣ муовини вазири тандурустӣ ва ҳифзи иҷтимоии аҳолӣ Зулфия Абдусаматзода, роҳбари намояндагии Хазинаи кӯдакони Созмони Милали Муттаҳид (ЮНИСЕФ) дар Тоҷикистон Артур ван Дизен, мутахассиси техникии бахши иммунизатсияи Созмони ҷаҳонии тандурустӣ Салоҳуддин Саъдӣ, саратоншинос, доктори илмҳои тиб Саида Умарзода, шарикон оид ба рушд, масъулини соҳа ва 40 нафар намояндагони ВАО иштирок намуданд.
Маврид ба зикр аст, ки Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи омодагӣ ба вориднамоии иммунизатсия бар зидди вируси папиломаи одам, ки чораи муҳим дар самти пешгирии саратони гарданаки бачадон маҳсуб меёбад, силсилаи машғулиятҳои омӯзиширо барои кормандони ВАО оғоз намуд.
Иброз гардид, ки бо мақсади амалисозии қарори Ҳукумати ҶумҳурииТоҷикистон «Дар бораи гузаронидани чорабинии иммунизатсионии оммавӣ бар зидди вируси папилломаи одам дар Ҷумҳурии Тоҷикистон», ки аз 24 июли соли 2025, № 408 тасдиқ карда шудааст, ҷиҳати баланд бардоштани сатҳи иттилоотнокии намояндагони воситаҳои ахбори омма оид ба инъикоси дурусти рафти амалисозии иммунизатсия барзидди вируси папилломаи одам дар рафти гузаронидани чорабинии иммунизатсионии оммавӣ бар зидди вируси папилломаи одам дар Ҷумҳурии Тоҷикистон, бо иштироки мутахассисони сатҳи миллӣ ва вилоятӣ, рӯзноманигорону муҳаррирони воситаҳои ахбори омма (телевизион, радио, нашрияҳои чопӣ, сомонаҳои иттилоотию таҳлилӣ) ва кормандони марказҳои матбуотии сохторҳои тандурустӣ ба роҳ монда шудааст.
Иммунизатсия бо истифода аз ваксинаи Гардасил гузаронида мешавад. Ваксинаи мазкур қариб 20 сол мешавад, ки дар мамлакатҳои гуногуни ҷаҳон истифода мегардад ва дар ин муддат самарабахшии худро дар самти пешгирии навъҳои саратоновари вируси папиломаи инсон исбот намуд. Таҷриба нишон медиҳад, ки ин вирус омили асосии пайдоиши саратони гарданаки бачадон буда, ин бемории саратонӣ дар Ҷумҳурии Тоҷикистон дар байни бемориҳои саратонии занон дар ҷои дуюм меистад.
Ваксинаи мазкур дар доираи иммунизатсияи нақшавӣ ба духтарони 10 сола ва дар соли аввали ворид намоии иммунизатсия ба тақвими миллӣ ба духтарони 11-14 сола тавсия дода мешавад. Сабаби фарогирии синну соли мазкур дар он аст, ки дар ин давра иммунизатсия хеле самарбахш буда, ҷавоби иммунии қавиро таъмин месозад.
Зулфия Абдусаматзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон дар баромади хеш қайд намуд, ки “Иммунизатсия бар зидди вируси папиломаи одам воситаи асосии пешгирии бемориҳои пеш аз саратонӣ, инчунин саратонигарданаки бачадон, ки яке аз бемориҳои асосии саратонӣ миёни занон дар Ҷумҳурии Тоҷикистон маҳсуб меёбад, ба шумор меравад. Ин беморӣ на танҳо барои ҳаёти занон хатарнок мебошад, инчунин дар бисёри ҳолатҳо ба вайроншавии солимии репродуктивӣ сабаб мегардад”.
